Kados ing pemerintahan modern, wonten trap-trapan kapangkatan ing salebeting bebadan Abdi Dalem. Saksampunipun magang wetawis 2 tahun, bakal Abdi Dalem badhe dipunwisudha dados Abdi Dalem.

Trap-trapan kepangkatan Abdi Dalem miturut saking ngandhap:

• Jajar
• Bekel Anom
• Bekel Sepuh
• Lurah
• Penewu
• Wedono
• Riya Bupati
• Bupati Anom
• Bupati Sepuh
• Bupati Kliwon
• Bupati Nayoko
• Pangeran Sentana

Inggah-inggahan kapangkatan Abdi Dalem benten antawis Abdi Dalem Tepas lan Abdi Dalem Caos. Abdi Dalem Tepas inggih menika Abdi Dalem ingkang sakdinten-dintenipun nggadahi kuwajiban sowan wonten keraton. Inggah-inggahipun pangkat limrahipun saged dipunsuwun 3 tahun.

Wondene inggah-inggahipun kapangkatan Abdi Dalem Caos saged dipunsuwunaken 4-5 tahun sepisan.. Abdi Dalem Caos inggih menika Abdi Dalem ingkang mboten nggadhahi kuwajiban mlebet saben dinten. Abdi Dalem Caos namung mlebet ing wekdal-wekdal tertentu. Inggah-inggahan pangkat Abdi Dalem dipunatur dening Parentah Hageng. Parentah Hageng nggadahi panguwaos kangge misudha, minggahaken pangkat, saha ngrucat Abdi Dalem. Saben Abdi Dalem badhe nampi Asma Paring Dalem, Pangkat, lan Ayahan ingkang kaserat wonten ing Serat Kekancingan ingkang dipunwedalaken dening Parentah Hageng.

Sarat Minggahipun Pangkat Abdi Dalem

Wonten sawetawis pambiji ingkang saged ndayani minggahipun pangkat Abdi Dalem. Pambiji menika antawisipun kasregepan sowan dhateng keraton, nggadahi trapsila ingkang becik, lan sregep ngayahi jejibahan. Mboten mokal bilih Abdi Dalem saged dipun undur wekdalipun minggahipun jabatan menawi mboten nglampahi jejibahan kanthi becik lan mboten asring sowan dhateng keraton.

Saben 3 utawi 4 tahun sepisan, Abdi Dalem ingkang nggadahi latar pendidikan lan winasis saged pikantuk inggah-inggah pangkat saben tahun. Inggah-inggahan pangkat menika saged dipuntampi ngantos Wedono. Saksampunipun minggah dados wedono, Abdi Dalem kedah ndherek inggah-inggahan pangkat regular kados Abdi Dalem sanesipun.

Bupati Kliwon menika pangkat paling inggil ingkang saged dipuntampi kanthi reguler kaliyan Abdi Dalem. Saksanesipun inggah-inggahan pangkat ingkang limrah, wonten ugi inggah-inggah pangkat ingkang mirunggan. Inggah-inggahan ingkang mirunggan menika dhawuh saking sultan. Pangkat menika antawisipun Bupati Nayaka dan Pangeran Sentana.

Abdi Dalem saged dipunparingi pangkat Bupati Nayaka saha Pangeran Sentana menawi sampun pikantuk lilah saking Ngarsa Dalem. Inggah-inggahan pangkat menika nggadahi adhedhasar. Salah satunggalipun inggih menika lelabuhan saha pakaryanipun minangka Abdi Dalem. Mboten mokal bilih Abdi Dalem saged pikantuk inggah-inggahan pangkat mirunggan saking dhawuh sultan.

Tanggel Jawab Ingkang Nyarengi Pangkat Abdi Dalem

Inggah-inggahan pangkat ingkang dipuntampi dening Abdi Dalem ugi ndadosaken mindakipun ayahan lan tanggel jawab. Abdi Dalem ingkang nggadahi pangkat inggil saged dados pangarsa tumrap Abdi Dalem ingkang langkung ngandhap. Ayahan ingkang dipunparingaken kajumbuhaken kaliyan kasagedanipun, supados pamarentahan wonten ing keraton lumampah kanthi becik. Sajatosipun dados Abdi Dalem mboten mburu derajat saha pangkat.

Sanadyan sampun nggadahi pangkat ingkang inggil, Abdi Dalem mboten kenging sawenang-wenang dhumateng tiyang sanes ingkang wonten ngandhapipun. Unggah-ungguh kedah dipunlestantunaken supados kahananing wonten keraton tetep sekeca. Dados Abdi Dalem menika mboten mburu banda, ananing Abdi Dalem menika minangka abdi budaya.