꧋ꦯꦿꦶꦯꦸꦭ꧀ꦡꦤ꧀ꦲꦩꦼꦁꦏꦸꦨꦸꦮꦤ꧇꧑꧇꧉

꧋ꦥꦔꦺꦫꦤ꧀ꦩꦁꦏꦸꦨꦸꦩꦶ꧈ꦲꦶꦁꦏꦁꦩꦢꦼꦒ꧀ꦒꦏꦼꦤ꧀ꦏꦫꦠꦺꦴꦤ꧀ꦔꦪꦺꦴꦒꦾꦏꦂꦠꦥꦸꦤꦶꦏꦩꦶꦪꦺꦴꦱ꧀ꦲꦶꦁꦠꦁꦒꦭ꧀꧇꧕꧇ꦄꦒꦸꦱ꧀ꦠꦸꦱ꧀꧇꧑꧗꧑꧗꧇ꦏꦤ꧀ꦛꦶꦲꦱ꧀ꦩꦧꦼꦤ꧀ꦢꦫꦫꦢꦺꦤ꧀ꦩꦱ꧀ꦱꦸꦗꦤ꧉ꦥꦔꦺꦫꦤ꧀ꦩꦁꦏꦸꦨꦸꦩꦶꦲꦶꦁꦒꦶꦃꦥꦸꦤꦶꦏꦥꦸꦠꦿꦱꦸꦤꦤ꧀ꦲꦩꦁꦏꦸꦫꦠ꧀꧇꧔꧇ꦱꦏꦶꦁꦒꦂꦮꦲꦩ꧀ꦥꦺꦪꦤ꧀ꦲꦶꦁꦏꦁꦲꦱ꧀ꦩꦤꦶꦥꦸꦤ꧀ꦩꦱ꧀ꦲꦪꦸꦠꦺꦗꦮꦠꦶ꧉ꦲꦶꦁꦩꦁꦏꦺ꧈ꦥꦔꦺꦫꦤ꧀ꦩꦁꦏꦸꦨꦸꦩꦶꦩꦶꦤꦺꦴꦁꦏꦲꦶꦁꦏꦁꦥꦫꦶꦁꦢꦪꦱꦲꦏꦼꦏꦶꦪꦠ꧀ꦠꦤ꧀ꦝꦸꦩꦠꦼꦁꦏꦫꦠꦺꦴꦤ꧀ꦱꦲꦱꦼꦢꦪꦏꦮꦸꦭꦔꦪꦺꦴꦒꦾꦏꦂꦠꦲꦶꦁꦏꦁꦤꦼꦩ꧀ꦧꦺꦏꦺꦩꦮꦺꦴꦤ꧀ꦢꦸꦩꦢꦺꦴꦱ꧀꧈

꧋ꦮꦶꦮꦶꦠ꧀ꦲꦭꦶꦠ꧀‌ꦧ꧈ꦫ꧈ꦩ꧈ꦱꦸꦗꦤꦱꦩ꧀ꦥꦸꦤ꧀ꦩꦶꦱꦸꦮꦸꦂꦧꦶꦭꦶꦃꦠꦿꦩ꧀ꦥꦶꦭ꧀ꦲꦺꦴꦭꦃꦏꦥꦿꦗꦸꦫꦶꦠ꧀ꦠꦤ꧀꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦮꦱꦶꦱ꧀ꦤꦸꦫꦺꦴꦁꦒꦱꦲꦔꦱ꧀ꦠꦱꦼꦚ꧀ꦗꦠ꧉ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦲꦸꦒꦶꦠꦔꦠ꧀ꦔꦶꦧꦢꦃꦱꦂꦠꦠꦼꦠꦼꦥ꧀‌ꦔ꧀ꦭꦼꦭꦸꦫꦶꦧꦸꦢꦪꦊꦭꦸꦲꦸꦂ꧉ꦲꦮꦶꦠ꧀ꦱꦏꦶꦁꦥꦸꦤꦶꦏ꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦲꦶꦁꦏꦁꦥꦩꦤ꧀ꦲꦱ꧀ꦩꦩꦁꦏꦸꦨꦸꦩꦶꦱꦺꦢꦲꦶꦁꦠꦁꦒꦭ꧀꧇꧒꧗꧇ꦤꦺꦴꦥ꦳ꦺꦩ꧀ꦧꦼꦂ꧇꧑꧗꧓꧐꧇꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦢꦶꦥꦸꦤ꧀ꦮꦶꦱꦸꦣꦢꦢꦺꦴꦱ꧀ꦥꦔꦺꦫꦤ꧀ꦭꦸꦫꦃ꧈ꦲꦶꦁꦒꦶꦃꦥꦸꦤꦶꦏꦥꦔꦺꦫꦤ꧀ꦲꦶꦁꦏꦁꦢꦶꦥꦸꦤ꧀ꦲꦁꦒꦼꦥ꧀ꦱꦼꦥꦸꦃꦲꦶꦁꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦥꦫꦥꦸꦠꦿꦢꦊꦩ꧀꧈ꦲꦶꦁꦠꦼꦩ꧀ꦧꦺ꧈ꦱꦱꦩ꧀ꦥꦸꦤ꧀ꦤꦶꦥꦸꦤ꧀ꦔꦚ꧀ꦕꦶꦏ꧀ꦢꦶꦮꦱ꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦲꦸꦒꦶꦔꦒꦼꦩ꧀ꦲꦱ꧀ꦩꦲꦶꦁꦏꦁꦤꦸꦁꦒꦏ꧀ꦱꦼꦩꦶꦏꦭꦶꦪꦤ꧀ꦲꦶꦁꦏꦁꦥꦩꦤ꧀ꦲꦶꦁꦒꦶꦃꦥꦸꦤꦶꦏꦩꦁꦏꦸꦨꦸꦩꦶ꧉

꧋ꦔꦺꦔꦶꦁꦔꦶꦧꦧ꧀ꦠꦔꦠ꧀ꦠꦶꦥꦸꦤ꧀ꦔꦶꦧꦢꦃꦥꦔꦺꦫꦤ꧀ꦩꦁꦏꦸꦨꦸꦩꦶꦲꦶꦁꦏꦁꦥꦿꦶꦚ꧀ꦕꦶꦢꦶꦥꦸꦤ꧀ꦱꦼꦫꦠ꧀ꦮꦺꦴꦤ꧀ꦠꦼꦤ꧀ꦲꦶꦁꦱꦼꦫꦠ꧀ꦕꦼꦧꦺꦴꦭꦺꦏ꧀꧈ꦲꦶꦁꦩꦿꦶꦏꦸꦢꦶꦥꦸꦤ꧀ꦕꦫꦶꦪꦺꦴꦱ꧀ꦱꦏꦼꦤ꧀ꦧꦧ꧀ꦲꦢꦠ꧀ꦠꦶꦥꦸꦤ꧀ꦥꦔꦺꦫꦤ꧀ꦩꦁꦏꦸꦨꦸꦩꦶꦱꦶꦪꦩ꧀ꦱꦼꦤꦶꦤ꧀ꦏꦼꦩꦶꦱ꧀‌ꦱꦭꦠ꧀ꦒꦁꦱꦭ꧀ꦮꦼꦏ꧀ꦢꦭ꧀‌ꦱꦲꦔꦲꦺꦴꦱ꧀ꦏꦺꦴꦂꦄꦤ꧀꧈ꦲꦶꦁꦱꦼꦫꦠ꧀ꦥꦸꦤꦶꦏꦢꦶꦥꦸꦤ꧀ꦲꦤ꧀ꦝꦂꦫꦏꦼꦤ꧀ꦲꦸꦒꦶꦧꦧ꧀ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦲꦶꦁꦏꦁꦉꦩꦼꦤ꧀ꦊꦭꦤ꧈ꦱꦿꦮꦸꦁꦏꦭꦶꦪꦤ꧀ꦥꦧꦿꦪꦤ꧀ꦲꦒꦸꦁ꧈ꦱꦲꦥꦫꦶꦁꦧꦶꦪꦤ꧀ꦠꦸꦣꦸꦩꦠꦼꦁꦲꦶꦁꦏꦁꦱꦶꦱꦃ꧉

꧋ꦲꦮꦶꦠ꧀ꦱꦏꦶꦁꦧꦼꦧꦸꦢꦺꦤ꧀ꦤꦶꦥꦸꦤ꧀ꦲꦶꦁꦏꦁꦱꦲꦺꦥꦸꦤꦶꦏ꧈ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦥꦫꦥꦤ꧀ꦝꦺꦫꦺꦏ꧀ꦏꦶꦥꦸꦤ꧀ꦥꦔꦺꦫꦤ꧀ꦩꦁꦏꦸꦨꦸꦩꦶꦱꦔꦼꦠ꧀ꦲꦁꦒꦤ꧀ꦤꦶꦥꦸꦤ꧀ꦱꦼꦠꦾꦠꦸꦲꦸ꧉ꦲꦶꦁꦮꦂꦱ꧇꧑꧗꧔꧖꧇꧈ꦤꦭꦶꦏꦤꦼꦩ꧀ꦧꦺꦥꦼꦫꦁꦭꦮꦤ꧀ Vereenigde Oost-Indische Compagnie (VOC), ꦥꦔꦺꦫꦤ꧀ꦩꦁꦏꦸꦨꦸꦩꦶꦏꦒꦸꦁꦤ꧀ꦥꦤ꧀ꦝꦺꦫꦺꦏ꧀ꦕꦕꦃꦲꦶꦥꦸꦤ꧀꧇꧑꧓꧐꧐꧐꧇ꦥꦿꦗꦸꦫꦶꦠ꧀‌ꦲꦶꦁꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦮꦺꦴꦤ꧀ꦠꦼꦤ꧀꧇꧒꧕꧐꧐꧇ꦥꦿꦗꦸꦫꦶꦠ꧀ꦤꦸꦫꦺꦴꦁꦒ꧉ꦔꦤ꧀ꦠꦺꦴꦱ꧀ꦲꦶꦁꦮꦂꦱ꧇꧑꧗꧕꧐꧇ꦏꦛꦃꦠꦶꦪꦁꦲꦶꦁꦏꦁꦲꦤ꧀ꦝꦺꦫꦺꦏ꧀ꦔꦮꦸꦭꦣꦸꦩꦠꦼꦁꦥꦔꦺꦫꦤ꧀ꦩꦁꦏꦸꦨꦸꦩꦶ꧉

 

꧋ꦥꦥꦿꦁꦔꦤ꧀ꦱꦲꦊꦭꦧꦸꦃꦲꦤ꧀ꦠꦸꦩꦿꦥ꧀ꦩꦠꦫꦩ꧀꧈

꧋ꦮꦂꦱ꧇꧑꧗꧔꧐꧇ꦲꦶꦁꦒꦶꦃꦥꦸꦤꦶꦏꦮꦂꦱꦲꦶꦁꦏꦁꦲꦮꦿꦠ꧀ꦏꦁꦒꦺꦧꦸꦩꦶꦩꦠꦫꦩ꧀꧈ꦔꦿꦩꦤ꧀ꦢꦸꦩꦢꦺꦴꦱ꧀ꦮꦺꦴꦤ꧀ꦠꦼꦤ꧀ꦥꦸꦤ꧀ꦢꦶꦥꦸꦤ꧀ꦢꦶꦮꦶꦮꦶꦠ꧀ꦒꦺꦒꦺꦂꦥꦕꦶꦤꦲꦶꦁꦏꦁꦢꦶꦥꦸꦤ꧀ꦥꦤ꧀ꦝꦺꦒꦤ꧀ꦤꦶꦢꦺꦤꦶꦁꦱꦸꦤꦤ꧀ꦏꦸꦤꦶꦁꦲꦶꦁꦏꦁꦢꦶꦥꦸꦤ꧀ꦧꦶꦪꦤ꧀ꦠꦸꦥꦔꦺꦫꦤ꧀ꦱꦩ꧀ꦧꦼꦂꦚꦮ꧈ꦔꦤ꧀ꦠꦺꦴꦱ꧀ꦢꦸꦩꦸꦒꦶꦮꦺꦴꦤ꧀ꦠꦼꦤ꧀ꦤꦶꦁꦒꦺꦴꦭꦺꦴꦁꦒꦺꦴꦭꦺꦴꦁꦔꦤ꧀ꦠꦶꦪꦁꦲꦶꦁꦏꦁꦢꦩꦼꦭ꧀ꦉꦱꦃꦲꦶꦁꦏꦁꦢꦶꦥꦸꦤ꧀ꦔꦂꦱꦤ꧀ꦤꦶꦢꦺꦤꦶꦁꦥꦔꦺꦫꦤ꧀ꦱꦩ꧀ꦧꦼꦂꦚꦮꦥꦶꦪꦩ꧀ꦧꦏ꧀ꦲꦶꦁꦱꦭꦗꦼꦁꦔꦶꦥꦸꦤ꧀꧈ꦠꦼꦩꦃꦲꦤ꧀ꦤꦶꦥꦸꦤ꧀‌ꦏꦫꦠꦺꦴꦤ꧀ꦏꦼꦢꦃꦢꦶꦥꦸꦤ꧀ꦧꦺꦴꦪꦺꦴꦁꦱꦏꦶꦁꦏꦂꦠꦯꦸꦫꦣꦸꦩꦠꦼꦁꦯꦸꦫꦏꦂꦠꦲꦶꦁꦠꦁꦒꦭ꧀꧇꧑꧗꧇ꦥ꦳ꦺꦧꦿꦸꦮꦫꦶ꧇꧑꧗꧔꧕꧇꧉

꧋ꦏꦁꦒꦺꦔ꧀ꦭꦼꦉꦩ꧀ꦩꦏꦼꦤ꧀ꦔꦿꦩꦤ꧀ꦤꦶꦥꦸꦤ꧀ꦱꦩ꧀ꦧꦼꦂꦚꦮ꧈ꦱꦸꦱꦸꦲꦸꦤ꧀ꦤꦤ꧀ꦥꦏꦸꦨꦸꦮꦤ꧇꧒꧇ꦔꦮꦺꦴꦤ꧀ꦠꦼꦤ꧀ꦤꦏꦼꦤ꧀ꦱꦪꦼꦩ꧀ꦧꦫ꧈ꦲꦶꦁꦏꦁꦠꦸꦩꦸꦠ꧀ꦱꦲꦱꦒꦼꦢ꧀ꦩꦼꦤꦁꦔꦏꦼꦤ꧀ꦱꦪꦼꦩ꧀ꦧꦫꦲꦶꦁꦒꦶꦃꦥꦸꦤꦶꦏꦥꦔꦺꦫꦤ꧀ꦩꦁꦏꦸꦨꦸꦩꦶ꧉ꦱꦭꦗꦼꦁꦔꦶꦥꦸꦤ꧀‌ꦥꦔꦺꦫꦤ꧀ꦩꦁꦏꦸꦨꦸꦩꦶꦧꦣꦺꦔꦸꦮꦲꦺꦴꦱ꧀ꦥꦱꦶꦱꦶꦂꦭꦺꦂꦗꦮꦶꦩꦶꦤꦺꦴꦁꦏꦕꦫꦏꦁꦒꦺꦔꦶꦫꦁꦔꦶꦢꦪꦤꦶꦁVOCꦲꦶꦁꦧꦸꦩꦶꦩꦠꦫꦩ꧀꧈ꦲꦤꦔꦶꦁꦲꦮꦶꦠ꧀ꦱꦏꦶꦁꦠꦶꦤ꧀ꦢꦏ꧀ꦕꦶꦢꦿꦱꦲꦥꦶꦪꦭꦢꦶꦥꦸꦤ꧀ꦠꦶꦤ꧀ꦢꦏ꧀ꦏꦏꦼꦤ꧀ꦢꦺꦤꦶꦁꦥꦠꦶꦃꦥꦿꦶꦁꦒꦭꦪꦲꦶꦁꦏꦁꦢꦶꦱꦼꦁꦏꦸꦪꦸꦁꦢꦺꦤꦶꦁVOC꧈ꦭꦩ꧀ꦥꦃꦲꦶꦥꦸꦤ꧀ꦥꦔꦺꦫꦤ꧀ꦩꦁꦏꦸꦨꦸꦩꦶꦠꦤ꧀ꦱꦃꦤꦼꦩꦃꦲꦶꦥꦼꦥꦭꦁ꧉

꧋ꦲꦮꦶꦠ꧀ꦱꦏꦶꦁꦏꦢꦢꦺꦴꦱ꧀ꦱꦤ꧀ꦏꦱꦼꦧꦠ꧀‌ꦥꦔꦺꦫꦤ꧀ꦩꦁꦏꦸꦨꦸꦩꦶꦭꦗꦼꦁꦩꦶꦭꦶꦃꦩꦼꦢꦭ꧀ꦱꦏꦶꦁꦏꦫꦠꦺꦴꦤ꧀ꦭꦗꦼꦁꦩꦶꦮꦶꦠ꧀ꦠꦶꦥꦥꦿꦁꦔꦤ꧀ꦝꦠꦼꦁVOC꧉ꦠꦸꦩꦶꦤ꧀ꦢꦏ꧀ꦥꦸꦤꦶꦏꦢꦶꦥꦸꦤ꧀ꦱꦼꦁꦏꦸꦪꦸꦁꦢꦺꦤꦶꦁꦥꦔꦺꦫꦤ꧀ꦱꦩ꧀ꦧꦼꦂꦚꦮ꧉ꦱꦱꦉꦁꦔꦤ꧀ꦏꦭꦶꦪꦤ꧀ꦥꦔꦺꦫꦤ꧀ꦱꦩ꧀ꦧꦼꦂꦚꦮ꧈ꦥꦔꦺꦫꦤ꧀ꦩꦁꦏꦸꦨꦸꦩꦶꦏꦱꦶꦭ꧀ꦩꦂꦢꦶꦏꦏ꧀ꦲꦏꦼꦤ꧀ꦮꦼꦠꦮꦶꦱ꧀ꦭꦭꦢꦤ꧀ꦱꦏꦶꦁVOC꧉


꧋ꦲꦶꦁꦮꦂꦱ꧇꧑꧗꧔꧙꧇꧈ꦏꦲꦤꦤ꧀ꦏꦱꦫꦱ꧀ꦱꦤ꧀ꦤꦶꦥꦸꦤ꧀ꦱꦶꦤꦸꦲꦸꦤ꧀ꦥꦏꦸꦨꦸꦮꦤ꧇꧒꧇ꦱꦪꦩꦤ꧀ꦝꦥ꧀꧈ꦮꦭꦺꦴꦤ꧀ꦢꦲꦁꦒꦶꦤꦏ꧀ꦲꦏꦼꦤ꧀ꦏꦲꦤꦤ꧀ꦥꦸꦤꦶꦏꦏꦤ꧀ꦛꦶꦩꦼꦢꦭ꧀ꦭꦏꦼꦤ꧀ꦠꦿꦏ꧀ꦠꦠ꧀ꦲꦶꦁꦏꦁꦲꦶꦱꦶꦤꦶꦥꦸꦤ꧀ꦥꦚꦿꦃꦲꦤ꧀ꦏꦫꦠꦺꦴꦤ꧀ꦩꦠꦫꦩ꧀ꦱꦼꦢꦪꦤꦶꦥꦸꦤ꧀ꦝꦸꦩꦠꦼꦁVOCꦲꦶꦁꦠꦁꦒꦭ꧀꧇꧑꧖꧇ꦣꦺꦱꦺꦩ꧀ꦧꦼꦂ꧇꧑꧗꧔꧙꧇꧉ꦧꦺꦴꦠꦼꦤ꧀ꦢꦔꦸ꧈ꦤꦩꦸꦁꦏꦊꦠ꧀ꦠꦤ꧀ꦢꦶꦤ꧀ꦠꦼꦤ꧀ꦥꦏꦸꦨꦸꦮꦤ꧇꧒꧇ꦱꦸꦫꦸꦢ꧀‌ꦭꦗꦼꦁꦢꦶꦥꦸꦤ꧀ꦱꦸꦭꦶꦃꦲꦶꦢꦺꦤꦶꦁꦥꦸꦠꦿꦤꦶꦥꦸꦤ꧀‌ꦥꦏꦸꦨꦸꦮꦤ꧇꧓꧇꧉ꦩꦔꦽꦠꦺꦴꦱ꧀ꦧꦶꦭꦶꦃꦮꦺꦴꦤ꧀ꦠꦼꦤ꧀ꦠꦿꦏ꧀ꦠꦠ꧀ꦏꦱꦼꦧꦠ꧀‌ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦥꦔꦺꦫꦤ꧀ꦩꦁꦏꦸꦨꦸꦩꦶꦱꦲꦥꦔꦺꦫꦤ꧀ꦱꦩ꧀ꦧꦼꦂꦚꦮꦱꦪꦱꦼꦉꦁꦲꦁꦒꦺꦤ꧀ꦤꦶꦥꦸꦤ꧀ꦤꦼꦩ꧀ꦥꦸꦃꦩꦼꦁꦱꦃ꧉ꦠꦼꦩꦃꦲꦤ꧀ꦤꦶꦥꦸꦤ꧀ꦤꦩꦸꦁꦲꦺꦠꦁꦔꦤ꧀ꦱꦱꦶ꧈ꦱꦱꦠ꧀ꦱꦢꦪꦮꦼꦮꦼꦁꦏꦺꦴꦤ꧀ꦏꦫꦠꦺꦴꦤ꧀ꦩꦠꦫꦩ꧀ꦱꦩ꧀ꦥꦸꦤ꧀ꦱꦒꦼꦢ꧀ꦢꦶꦥꦸꦤ꧀ꦏꦸꦮꦲꦺꦴꦱ꧀ꦱꦶꦢꦺꦤꦶꦁꦥꦔꦺꦫꦤ꧀ꦩꦁꦏꦸꦨꦸꦩꦶ꧉

꧋ꦲꦮꦶꦠ꧀ꦒꦒꦭ꧀ꦲꦁꦒꦺꦤ꧀ꦤꦶꦥꦸꦤ꧀ꦩꦼꦁꦱꦃꦣꦠꦼꦁꦥꦔꦺꦫꦤ꧀ꦩꦁꦏꦸꦨꦸꦩꦶ꧈ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦒꦸꦧꦼꦂꦤꦸꦂꦗꦮꦱꦶꦱꦶꦃꦭꦺꦂ꧈ꦧꦫꦺꦴꦤ꧀ꦥ꦳ꦤ꧀ꦲꦺꦴꦲꦼꦤ꧀ꦢꦿꦺꦴꦥ꧀ꦩꦸꦤ꧀ꦢꦸꦂ꧉ꦏꦗꦮꦶꦱꦏꦶꦁꦥꦸꦤꦶꦏ꧈ꦒꦸꦧꦼꦂꦤꦸꦂꦗꦺꦤ꧀ꦢꦼꦫꦭ꧀ꦥ꦳ꦤ꧀ꦆꦩ꧀ꦲꦺꦴꦥ꧀ꦲꦶꦁꦏꦁꦊꦁꦒꦃꦮꦺꦴꦤ꧀ꦠꦼꦤ꧀ꦧꦠꦮꦶꦪꦃꦲꦸꦒꦶꦠꦸꦩꦸꦠ꧀ꦫꦸꦩꦲꦺꦴꦱ꧀ꦏꦱꦺꦴꦂꦫꦤ꧀‌ꦏꦁꦱꦭꦗꦼꦁꦔꦶꦥꦸꦤ꧀ꦤꦤ꧀ꦢꦁꦒꦼꦫꦃꦠꦼꦩꦃꦲꦤ꧀ꦱꦺꦢ꧉ꦱꦭꦗꦼꦁꦔꦶꦥꦸꦤ꧀ꦥꦁꦏꦠ꧀ꦒꦸꦧꦼꦂꦤꦸꦂꦗꦮꦭꦺꦂꦲꦶꦁꦏꦁꦩꦥꦤ꧀ꦲꦶꦁꦱꦼꦩꦫꦁꦢꦶꦥꦸꦤ꧀ꦱꦿꦃꦲꦏꦼꦤ꧀ꦝꦸꦩꦠꦼꦁꦤꦶꦏꦺꦴꦭꦱ꧀ꦲꦂꦠꦶꦃ꧉

꧋ꦲꦺꦴꦮꦃꦲꦺꦴꦮꦃꦲꦤ꧀ꦥꦩꦫꦺꦤ꧀ꦠꦃꦲꦤ꧀ꦏꦱꦼꦧꦠ꧀ꦲꦤ꧀ꦢꦢꦺꦴꦱ꧀ꦱꦏꦼꦤ꧀ꦲꦸꦒꦶꦲꦺꦴꦮꦃꦲꦶꦁꦕꦫꦔꦿꦩ꧀ꦥꦸꦁꦔꦏꦼꦤ꧀ꦥꦼꦂꦏꦮꦶꦱ꧀ꦱꦶꦥꦸꦤ꧀꧈ꦲꦂꦠꦶꦃꦲꦶꦁꦏꦁꦏꦺꦴꦤ꧀ꦝꦁꦲꦁꦒꦺꦤ꧀ꦤꦶꦥꦸꦤ꧀‌ꦩ꧀ꦭꦶꦥꦶꦱ꧀ꦧꦱꦗꦮꦶꦏꦒꦸꦁꦔꦤ꧀ꦥꦩꦁꦒꦶꦃꦧꦶꦭꦶꦃꦏꦁꦒꦺꦔꦿꦩ꧀ꦥꦸꦁꦔꦏꦼꦤ꧀ꦥꦼꦂꦏꦮꦶꦱ꧀ꦥꦸꦤꦶꦏꦤꦩꦸꦁꦱꦒꦼꦢ꧀ꦏꦤ꧀ꦛꦶꦕꦫꦚꦏꦼꦠ꧀ꦠꦶꦥꦔꦺꦫꦤ꧀ꦩꦁꦏꦸꦨꦸꦩꦶꦱꦲꦤꦮꦏ꧀ꦲꦏꦼꦤ꧀ꦧꦼꦣꦩꦺꦤ꧀꧈ꦲꦮꦶꦠ꧀ꦩꦔꦼꦂꦠꦺꦴꦱ꧀ꦱꦶꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦧꦺꦴꦠꦼꦤ꧀ꦱꦒꦼꦢ꧀‌ꦔ꧀ꦭꦩ꧀ꦥꦃꦲꦶꦥꦶꦪꦩ꧀ꦧꦏ꧀ꦩꦶꦭꦔꦸꦠꦸꦱ꧀ꦥꦶꦪꦤ꧀ꦠꦸꦤ꧀ꦠꦸꦫꦸꦤ꧀ꦄꦫꦧ꧀‌ꦱꦾꦺꦃꦆꦧꦿꦲꦶꦩ꧀ꦲꦸꦠꦮꦶꦭꦶꦩꦿꦃꦏꦮꦱ꧀ꦠꦤ꧀ꦤꦤ꧀ꦤꦤ꧀ꦠꦸꦮꦤ꧀ꦱꦫꦶꦥ꧀ꦧꦼꦱꦂ꧈ꦏꦁꦒꦺꦤꦮꦏ꧀ꦲꦏꦼꦤ꧀ꦥꦥꦁꦒꦶꦃꦲꦤ꧀ꦝꦸꦩꦠꦼꦁꦥꦔꦺꦫꦤ꧀ꦩꦁꦏꦸꦨꦸꦩꦶ꧉


꧋ꦲꦶꦁꦠꦁꦒꦭ꧀꧇꧒꧓꧇ꦱꦺꦥ꧀ꦠꦺꦩ꧀ꦧꦼꦂ꧇꧑꧗꧕꧔꧇꧈ꦥꦥꦁꦒꦶꦃꦲꦤ꧀ꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦲꦂꦠꦶꦃꦏꦭꦶꦪꦤ꧀ꦥꦔꦺꦫꦤ꧀ꦩꦁꦏꦸꦨꦸꦩꦶꦤꦸꦮꦸꦃꦲꦏꦼꦤ꧀ꦏꦱꦶꦭ꧀꧈ꦮꦺꦴꦱ꧀ꦱꦶꦁꦉꦩ꧀ꦧꦒ꧀ꦲꦶꦁꦒꦶꦃꦥꦸꦤꦶꦏꦫꦚ꧀ꦕꦁꦔꦤ꧀ꦥꦿꦗꦚ꧀ꦗꦺꦤ꧀ꦲꦶꦁꦏꦁꦠꦼꦩ꧀ꦧꦺꦢꦶꦥꦸꦤ꧀ꦱꦼꦫꦠ꧀ꦥꦭꦶꦃꦲꦤ꧀ꦤꦒꦫꦶ꧉ꦲꦱꦶꦭ꧀ꦭꦶꦥꦸꦤ꧀ꦥꦥꦁꦒꦶꦃꦲꦤ꧀ꦢꦶꦥꦸꦤ꧀ꦲꦠꦸꦂꦫꦏꦼꦤ꧀ꦝꦸꦩꦠꦼꦁꦒꦸꦧꦼꦂꦤꦸꦂꦗꦺꦤ꧀ꦢꦼꦫꦭ꧀ꦱꦲꦱꦶꦤꦸꦲꦸꦤ꧀ꦥꦏꦸꦨꦸꦮꦤ꧇꧓꧇꧉ꦱꦶꦤꦸꦲꦸꦤ꧀ꦥꦏꦸꦨꦸꦮꦤ꧇꧓꧇ꦚꦫꦸꦗꦸꦏ꧀ꦏꦶꦲꦶꦁꦠꦁꦒꦭ꧀꧇꧔꧇ꦤꦺꦴꦥ꦳ꦺꦩ꧀ꦧꦼꦂ꧇꧑꧗꧕꧔꧇꧉ꦱꦭꦗꦼꦁꦔꦶꦥꦸꦤ꧀ꦲꦱꦶꦭ꧀ꦭꦶꦥꦸꦤ꧀ꦥꦱꦫꦸꦗꦸꦏ꧀ꦏꦤ꧀ꦏꦱꦼꦧꦠ꧀ꦢꦶꦥꦸꦤ꧀ꦢꦢꦺꦴꦱ꧀ꦱꦏꦼꦤ꧀ꦥꦿꦗꦚ꧀ꦗꦺꦤ꧀ꦒꦶꦪꦤ꧀ꦠꦶꦏꦁꦲꦶꦁꦠꦁꦒꦭ꧀꧇꧑꧓꧇ꦥ꦳ꦺꦧꦿꦸꦮꦫꦶ꧇꧑꧗꧕꧕꧇ꦢꦶꦥꦸꦤ꧀ꦠꦥꦏ꧀ꦲꦱ꧀ꦠꦤ꧀ꦤꦶ꧉ꦏꦤ꧀ꦛꦶꦩꦏꦠꦼꦤ꧀‌ꦥꦔꦺꦫꦤ꧀ꦩꦁꦏꦸꦨꦸꦩꦶꦏꦤ꧀ꦛꦶꦲꦱ꧀ꦩꦯꦿꦶꦯꦸꦭ꧀ꦡꦤ꧀ꦲꦩꦼꦁꦏꦸꦨꦸꦮꦤ꧇꧑꧇꧉

 

꧋ꦏꦱꦸꦭ꧀ꦠꦤ꧀ꦤꦤ꧀ꦩꦠꦫꦩ꧀ꦔꦪꦺꦴꦒꦾꦏꦂꦠꦲꦢꦶꦤꦶꦁꦔꦿꦠ꧀꧈

꧋ꦲꦶꦁꦧꦧꦢ꧀ꦤꦶꦠꦶꦏ꧀ꦔꦪꦺꦴꦒꦾ꧈ꦢꦶꦥꦸꦤ꧀ꦕꦫꦶꦪꦺꦴꦱ꧀ꦱꦏꦼꦤ꧀ꦧꦧ꧀ꦏꦮꦶꦕꦏ꧀ꦱꦤꦤ꧀ꦱꦲꦏꦱꦲꦺꦤꦤ꧀ꦤꦶꦥꦸꦤ꧀ꦱꦸꦭ꧀ꦠꦤ꧀ꦲꦩꦼꦁꦏꦸꦨꦸꦮꦤ꧇꧑꧇꧉ꦢꦶꦥꦸꦤ꧀ꦱꦼꦧꦠ꧀ꦠꦏꦼꦤ꧀ꦲꦸꦒꦶꦧꦧ꧀ꦏꦠꦿꦩ꧀ꦥꦶꦭꦤ꧀ꦤꦶꦥꦸꦤ꧀ꦲꦶꦁꦧꦧ꧀ꦲꦂꦱꦶꦠꦺꦏ꧀ꦠꦸꦂ꧉ꦏꦁꦒꦺꦤꦼꦩ꧀ꦠꦺꦴꦏ꧀ꦲꦏꦼꦤ꧀ꦢꦸꦤꦸꦁꦔꦶꦁꦏꦫꦠꦺꦴꦤ꧀ꦔꦪꦺꦴꦒꦾꦏꦂꦠ꧈ꦩꦶꦠꦸꦫꦸꦠ꧀ꦕꦛꦺꦠ꧀ꦠꦤ꧀ꦏꦱꦼꦧꦠ꧀‌ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦤꦶꦩ꧀ꦧꦁꦱꦸꦥꦢꦺꦴꦱ꧀ꦲꦶꦁꦧꦺꦚ꧀ꦗꦁꦏꦫꦠꦺꦴꦤ꧀ꦱꦒꦼꦢ꧀ꦢꦩꦼꦭ꧀ꦫꦲꦂꦗꦱꦲꦠꦼꦤ꧀ꦠꦽꦩ꧀ꦩꦶꦁꦏꦮꦸꦭꦔꦪꦺꦴꦒꦾꦏꦂꦠ꧉

꧋ꦏꦫꦠꦺꦴꦤ꧀ꦔꦪꦺꦴꦒꦾꦏꦂꦠꦏꦁꦩꦢꦼꦒ꧀ꦗꦼꦗꦼꦒ꧀ꦔꦤ꧀ꦠꦺꦴꦱ꧀ꦱꦥꦸꦤꦶꦏꦢꦸꦩꦸꦤꦸꦁꦮꦺꦴꦤ꧀ꦠꦼꦤ꧀ꦲꦶꦁꦥꦥꦤ꧀ꦲꦶꦁꦏꦁꦱꦲꦺ꧉ꦢꦶꦥꦸꦤ꧀ꦏꦸꦥꦼꦁꦔꦶꦢꦺꦤꦶꦁꦭꦺꦥꦺꦤ꧀ꦕꦺꦴꦣꦺꦮꦺꦴꦤ꧀ꦠꦼꦤ꧀ꦱꦶꦱꦶꦃꦮꦺꦠꦤ꧀꧈ꦱꦲꦭꦺꦥꦺꦤ꧀ꦮꦶꦤꦔꦮꦺꦴꦤ꧀ꦠꦼꦤ꧀ꦱꦶꦱꦶꦃꦏꦶꦭꦺꦤ꧀꧈ꦮꦺꦴꦤ꧀ꦠꦼꦤ꧀ꦱꦶꦱꦶꦃꦭꦺꦂꦢꦶꦥꦸꦤ꧀ꦮꦠꦼꦱ꧀ꦱꦶꦢꦺꦤꦶꦁꦉꦢꦶꦩꦼꦫꦥꦶꦮꦺꦴꦤ꧀ꦢꦺꦤꦺꦲꦶꦁꦱꦶꦱꦶꦃꦏꦶꦢꦸꦭ꧀ꦢꦶꦥꦸꦤ꧀ꦮꦠꦼꦱ꧀ꦱꦶꦒꦶꦱꦶꦏ꧀ꦱꦼꦒꦤ꧀ꦠꦼꦤ꧀ꦏꦶꦢꦸꦭ꧀꧈ꦮꦮꦔꦸꦤ꧀ꦤꦤ꧀ꦤꦶꦁꦏꦫꦠꦺꦴꦤ꧀ꦱꦼꦢꦪꦢꦶꦥꦸꦤ꧀ꦫꦚ꧀ꦕꦁꦢꦺꦤꦶꦁꦯꦿꦶꦯꦸꦭ꧀ꦡꦤ꧀ꦲꦩꦼꦁꦏꦸꦨꦸꦮꦤ꧇꧑꧇ꦥꦶꦪꦩ꧀ꦧꦏ꧀꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦲꦸꦒꦶꦲꦶꦁꦏꦁꦔꦿꦚ꧀ꦕꦁꦠꦠꦮꦮꦔꦸꦤ꧀ꦤꦤ꧀ꦤꦶꦁꦏꦫꦠꦺꦴꦤ꧀ꦯꦸꦫꦏꦂꦠ꧉ꦲꦶꦁꦏꦫꦠꦺꦴꦤ꧀ꦔꦪꦺꦴꦒꦾꦏꦂꦠꦧꦺꦴꦠꦼꦤ꧀ꦤꦩꦸꦁꦠꦠꦮꦮꦔꦸꦤ꧀ꦤꦤ꧀‌ꦱꦼꦢꦪꦉꦉꦁꦒꦤ꧀ꦔꦤ꧀ꦠꦺꦴꦱ꧀ꦢꦸꦩꦸꦒꦶꦠꦸꦠꦸꦮꦸꦃꦲꦤ꧀ꦱꦗꦿꦺꦴꦤ꧀ꦤꦺꦴꦁꦏꦫꦠꦺꦴꦤ꧀ꦢꦶꦥꦸꦤ꧀ꦫꦚ꧀ꦕꦁꦏꦤ꧀ꦛꦶꦱꦲꦺꦱꦲꦩꦼꦁꦏꦸꦮꦼꦂꦢꦶꦲꦶꦁꦏꦁꦲꦶꦁꦒꦶꦭ꧀꧈ꦏꦗꦮꦶꦔꦿꦚ꧀ꦕꦁꦮꦔꦸꦤ꧀ꦤꦤ꧀ꦏꦫꦠꦺꦴꦤ꧀‌ꦯꦿꦶꦯꦸꦭ꧀ꦡꦤ꧀ꦲꦩꦼꦁꦏꦸꦨꦸꦮꦤ꧇꧑꧇ꦲꦸꦒꦶꦔꦿꦚ꧀ꦕꦁꦠꦩꦤ꧀ꦱꦫꦶ꧉ꦲꦮꦶꦠ꧀ꦱꦏꦶꦁꦥꦸꦤꦶꦏ꧈ꦱꦼꦗꦫꦮꦤ꧀ꦥꦫꦶꦁꦱꦼꦱꦼꦧꦠ꧀ꦠꦤ꧀ꦝꦸꦩꦠꦼꦁꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦩꦶꦤꦺꦴꦁꦏ a great builder ꦏꦢꦺꦴꦱ꧀ꦱꦸꦭ꧀ꦠꦤ꧀ꦲꦒꦸꦁ꧉

꧋ꦮꦫꦶꦱ꧀ꦱꦤ꧀ꦱꦿꦶꦱꦸꦭ꧀ꦠꦤ꧀ꦲꦩꦼꦁꦏꦸꦨꦸꦮꦤ꧇꧑꧇ꦏꦁꦒꦺꦮꦂꦒꦪꦺꦴꦒꦾꦏꦂꦠꦲꦒꦼꦁꦱꦔꦼꦠ꧀꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦲꦶꦁꦏꦁꦥꦫꦶꦁꦥꦶꦮꦸꦭꦁꦧꦧ꧀ꦮꦠꦏ꧀ꦱꦠꦿꦶꦪ꧈ꦲꦶꦁꦒꦶꦃꦥꦸꦤꦶꦏꦚꦮꦶꦗꦶ꧈ꦒꦽꦒꦼꦠ꧀‌ꦱꦼꦁꦒꦸꦃ꧈ꦲꦺꦴꦫꦩꦶꦁꦏꦸꦃ꧉ꦥꦶꦮꦸꦭꦁꦭꦸꦲꦸꦂꦥꦸꦤꦶꦏꦢꦶꦥꦸꦤ꧀ꦲꦒꦼꦩ꧀ꦲꦶꦁꦠꦠꦭꦏꦸꦥꦿꦗꦸꦫꦶꦠ꧀ꦲꦶꦁꦏꦫꦠꦺꦴꦤ꧀꧈ꦲꦧ꧀ꦢꦶꦢꦊꦩ꧀‌ꦱꦲꦫꦶꦤꦼꦱꦼꦥ꧀ꦗꦿꦺꦴꦤ꧀ꦤꦶꦁꦠꦠꦧꦼꦏ꧀ꦱꦤ꧀ꦲꦶꦁꦏꦁꦮꦶꦤꦱ꧀ꦠꦤ꧀ꦗꦺꦴꦒꦺꦢ꧀ꦩꦠꦫꦩ꧀꧈ꦯꦿꦶꦯꦸꦭ꧀ꦡꦤ꧀ꦲꦩꦼꦁꦏꦸꦨꦸꦮꦤ꧇꧑꧇ꦲꦸꦒꦶꦥꦫꦶꦁꦥꦶꦮꦸꦭꦁꦧꦧ꧀꧊ꦒꦺꦴꦭꦺꦴꦁꦒꦶꦭꦶꦒ꧀ꦩꦤꦸꦁꦒꦭ꧀ꦭꦶꦁꦏꦮꦸꦭꦒꦸꦱ꧀ꦠꦶ꧊ꦱꦂꦠ꧊ꦲꦩꦼꦩꦪꦸꦲꦪꦸꦤꦶꦁꦧꦮꦤ꧊꧉ꦱꦼꦢꦪꦤꦶꦥꦸꦤ꧀ꦢꦶꦥꦸꦤ꧀ꦲꦸꦒꦼꦩ꧀ꦩꦶꦱꦲꦢꦶꦥꦸꦤ꧀ꦲꦒꦼꦩ꧀ꦥꦫꦏꦮꦸꦭꦧꦺꦴꦠꦼꦤ꧀ꦤꦩꦸꦁꦲꦶꦁꦏꦫꦠꦺꦴꦤ꧀ꦤꦔꦶꦁꦏꦒꦼꦩ꧀ꦱꦼꦢꦪꦮꦂꦪꦺꦴꦒꦾꦏꦂꦠ꧉


꧋ꦲꦶꦁꦧꦧꦒꦤ꧀ꦱꦼꦤꦶ꧈ꦠꦶꦭꦫꦤ꧀ꦤꦶꦥꦸꦤ꧀ꦱꦿꦶꦱꦸꦭ꧀ꦠꦤ꧀ꦲꦩꦼꦁꦏꦸꦨꦸꦮꦤ꧇꧑꧇ꦲꦶꦁꦲꦤ꧀ꦠꦮꦶꦱ꧀ꦱꦶꦥꦸꦤ꧀ꦲꦶꦁꦒꦶꦃꦥꦸꦤꦶꦏꦧꦼꦏ꧀ꦱꦤ꧀ꦭꦮꦸꦁ꧈ꦧꦼꦏ꧀ꦱꦤ꧀ꦫꦶꦁꦒꦶꦠ꧀ꦠꦶꦪꦁꦭꦩ꧀ꦥꦃꦲꦤ꧀ꦒꦺꦴꦤ꧀ꦢꦮꦼꦂꦢꦪ꧈ꦧꦼꦏ꧀ꦱꦤ꧀ꦲꦺꦠꦺꦁ꧈ꦱꦲꦫꦶꦁꦒꦶꦠ꧀ꦥꦸꦂꦮ꧉

꧋ꦯꦿꦶꦯꦸꦭ꧀ꦡꦤ꧀ꦲꦩꦼꦁꦏꦸꦨꦸꦮꦤ꧇꧑꧇ꦱꦸꦫꦸꦢ꧀ꦲꦶꦁꦠꦁꦒꦭ꧀꧇꧒꧔꧇ꦩꦉꦠ꧀꧇꧑꧗꧙꧒꧇꧌꧇꧑꧇ꦫꦸꦮꦃ꧇꧑꧗꧑꧘꧇꧍꧈ꦭꦗꦼꦁꦢꦶꦥꦸꦤ꧀ꦱꦫꦺꦏ꧀ꦲꦏꦼꦤ꧀ꦮꦺꦴꦤ꧀ꦠꦼꦤ꧀ꦲꦶꦁꦲꦱ꧀ꦠꦤꦏꦱꦸꦮꦂꦒꦤ꧀‌ꦥꦗꦶꦩꦠ꧀ꦠꦤ꧀ꦲꦶꦩꦒꦶꦫꦶ꧉ꦲꦶꦁꦠꦼꦩ꧀ꦧꦺ꧈ꦠꦁꦒꦭ꧀꧇꧓꧇ꦤꦺꦴꦥ꦳ꦺꦩ꧀ꦧꦼꦂ꧇꧒꧐꧐꧖꧇꧈ꦥꦚ꧀ꦗꦼꦤꦼꦁꦔꦤ꧀ꦤꦶꦥꦸꦤ꧀ꦢꦶꦥꦸꦤ꧀ꦏꦸꦏꦸꦃꦲꦏꦼꦤ꧀ꦩꦶꦤꦺꦴꦁꦏꦥꦃꦭꦮꦤ꧀ꦤꦱꦶꦪꦺꦴꦤꦭ꧀ꦲꦮꦶꦠ꧀ꦭꦭꦧꦸꦃꦲꦤ꧀ꦤꦶꦥꦸꦤ꧀ꦠꦸꦩꦿꦥ꧀ꦤꦒꦫ꧉

PROFIL HB Ka 10

TATA PEMERINTAHAN